បាងកក៖ តាមកាសែតថៃ The Nation បានរាយការណ៍ថា គណៈកម្មាធិការសិទ្ធិមនុស្សជាតិ របស់ថៃ(NHRC) នៅថ្ងៃព្រហស្បតិ៍នេះ បានដោះស្រាយបញ្ហាក្រុមរដ្ឋាភិបាលថតរូបអ្នកកាសែត ខណៈពួកគេកំពុងសាកសួរនាយករដ្ឋមន្ត្រីអំពីជម្លោះព្រំដែនកម្ពុជា-ថៃ។ ហេតុការណ៍នេះបានជំរុញឲ្យសមាគមអ្នកកាសែតថៃចេញសេចក្តីថ្លែងការណ៍ព្រួយបារម្ភ។
Wasan Paileeklee ស្នងការសិទ្ធិមនុស្សជាតិថៃបានសង្កត់ធ្ងន់ថា សេរីភាពនៃការបញ្ចេញមតិ និងសេរីភាពសារព័ត៌មានត្រូវបានការពារក្រោមច្បាប់អន្តរជាតិ ជាពិសេសតាមរយៈកតិកាសញ្ញាអន្តរជាតិស្តីពីសិទ្ធិពលរដ្ឋ និងសិទ្ធិនយោបាយ ព្រមទាំងរដ្ឋធម្មនុញ្ញថៃ ដែលការពារសេរីភាពនៃទំនាក់ទំនង និងសារព័ត៌មាន។
លោកបានកត់សម្គាល់ថា រាល់ទម្រង់នៃការយាយី ឬការជ្រៀតជ្រែកដល់សេរីភាពសារព័ត៌មានមិនត្រឹមតែប៉ះពាល់ដល់អ្នកសារព័ត៌មានប៉ុណ្ណោះទេ ថែមទាំងប៉ះពាល់ដល់សិទ្ធិទទួលបានព័ត៌មានរបស់សាធារណជនផងដែរ ដោយលោកបានរំលេចពាក្យថា «ការបំបិទប្រព័ន្ធផ្សព្វផ្សាយ ស្មើនឹងការបំបិទមាត់សាធារណជន»។
វ៉ាសាន បានពន្យល់បន្ថែមថា កិច្ចសហការរវាងប្រភព អ្នកនយោបាយ និងប្រព័ន្ធផ្សព្វផ្សាយ ត្រូវតែផ្អែកលើការគោរពគ្នាទៅវិញទៅមក ដោយផ្តោតលើការការពារសេរីភាពនៃការទំនាក់ទំនង និងការបញ្ចេញមតិ។ លោកបានបន្ថែមថា សកម្មភាពថតរូបអ្នកកាសែត និងផ្សព្វផ្សាយរូបភាពទាំងនោះ ដើម្បីបង្កការរិះគន់ ឬការគម្រាមកំហែងដែលអាចកើតមានចំពោះអ្នកសារព័ត៌មាន គឺជាការមិនសមរម្យ និងជាការរំលោភលើសេរីភាពសារព័ត៌មាន។
លោកក៏បានលើកឡើងថា NHRC បាននិងកំពុងតាមដានបញ្ហាផ្សេងៗទាក់ទងនឹងសេរីភាព រួមទាំងសេរីភាពសារព័ត៌មាន។ ខណៈពេលដែលពាក្យបណ្តឹងទាក់ទងនឹងការប្រព្រឹត្តប្រព័ន្ធផ្សព្វផ្សាយដែលប៉ះពាល់ដល់សិទ្ធិរបស់អ្នកដទៃ ដូចជាចុងចោទត្រូវបានដោះស្រាយនាពេលកន្លងមក NHRC នឹងបន្តវាយតម្លៃ និងធ្វើសកម្មភាពលើពាក្យបណ្តឹងណាមួយប្រសិនបើចាំបាច់។
លោក វ៉ាសាន បន្ថែមថា អង្គការវិជ្ជាជីវៈបានសម្តែងការព្រួយបារម្ភរួចហើយ ដោយណែនាំឲ្យមានការប្រុងប្រយ័ត្ន ព្រោះនេះអាចត្រូវបានគេមើលឃើញថាជាការយាយីប្រព័ន្ធផ្សព្វផ្សាយ ដែលជាហេតុធ្វើឲ្យប៉ះពាល់ដល់សេរីភាពសារព័ត៌មាន។
#ThailandNews #សារព័ត៌មាន #NHRC
គណៈកម្មាធិការសិទ្ធិមនុស្សជាតិ ហៅការថតរូបភាពគំរាមអ្នកសារព័ត៌មាន ជំរុញឲ្យគោរពសេរីភាពសារព័ត៌មាន
