ឧត្តមសេនីយ Christian Freuding បាននិយាយថា ការវាយប្រហារដោយយន្តហោះគ្មានមនុស្សបើករបស់អ៊ុយក្រែន លើអាកាសយានដ្ឋានរុស្ស៊ី កាលពីថ្ងៃទី 1 ខែមិថុនា ប្រហែលជាបានបំផ្លាញប្រហែល 10ភាគរយ នៃកងយន្តហោះទម្លាក់គ្រាប់បែកយុទ្ធសាស្ត្ររបស់រុស្ស៊ី។
លោក Freuding បានិយាយនៅក្នុងផតឃែស្ថ ដូចរាយការណ៍ដោយអ៊ឺរ៉ុប Pravda ដោយដកស្រង់ពី Reuters។ «យោងតាមការវាយតម្លៃរបស់យើង យន្តហោះរាប់សិបគ្រឿងត្រូវបានខូចខាត យន្តហោះទម្លាក់គ្រាប់បែកយុទ្ធសាស្ត្រ TU-95 និង TU-22 ព្រមទាំងយន្តហោះស៊ើបការណ៍ A-50 ។
យោងតាមឧត្តមសេនីយដែលសម្របសម្រួលជំនួយយោធារបស់ទីក្រុងប៊ែកឡាំងដល់ទីក្រុងគៀវ និងធ្វើការយ៉ាងជិតស្និទ្ធជាមួយក្រសួងការពារជាតិអ៊ុយក្រែន យន្តហោះ A-50s ដែលមានមុខងារស្រដៀងនឹងយន្តហោះ AWACS របស់អង្គការណាតូក្នុងការផ្តល់ការឃ្លាំមើលតាមអាកាស ប្រហែលជាមិនដំណើរការទេ។
លោកបាននិយាយថា «យើងជឿថាពួកវាមិនអាចប្រើសម្រាប់គ្រឿងបន្លាស់បានទៀតទេ។ នេះគឺជាការខាតបង់ព្រោះថាមានយន្តហោះទាំងនេះតិចតួចប៉ុណ្ណោះ»។
លោកFreuding បានបន្ថែមថា «សម្រាប់កងយន្តហោះទម្លាក់គ្រាប់បែករយៈចម្ងាយឆ្ងាយ 10 ភាគរយ ត្រូវបានខូចខាតនៅក្នុងការវាយប្រហារនេះបើយោងតាមការវាយតម្លៃរបស់យើង»។
តាម មន្ត្រីអាមេរិកពីររូបបានប្រាប់រ៉យទ័រថា សហរដ្ឋអាមេរិកប៉ាន់ស្មានថា ការវាយប្រហារដោយយន្តហោះគ្មានមនុស្សបើករបស់អ៊ុយក្រែនបានវាយប្រហារយន្តហោះចម្បាំងរុស្ស៊ីដល់ទៅ 20 គ្រឿង ដោយបានបំផ្លាញប្រហែល 10 គ្រឿង។ អ្នកជំនាញនិយាយថា វានឹងចំណាយពេលច្រើនឆ្នាំរបស់ទីក្រុងម៉ូស្គូ ដើម្បីជំនួសយន្តហោះដែលរងផលប៉ះពាល់។
ទោះបីជាមានការខាតបង់ក៏ដោយ លោក Freuding មើលឃើញថា មិនមានការថយចុះភ្លាមៗនៃការវាយប្រហាររបស់រុស្ស៊ីលើអ៊ុយក្រែន ដោយកត់សម្គាល់ថាទីក្រុងមូស្គូនៅតែរក្សាបាន 90ភាគរយ នៃយន្តហោះទម្លាក់គ្រាប់បែកយុទ្ធសាស្ត្ររបស់ខ្លួន ដែលអាចបាញ់មីស៊ីលផ្លោង និងមីស៊ីល បន្ថែមពីលើការទម្លាក់គ្រាប់បែក។
លោកបាននិយាយថា «ប៉ុន្តែជាការពិតណាស់ មានផលប៉ះពាល់ដោយប្រយោល ដោយសារយន្តហោះដែលនៅសេសសល់នឹងត្រូវការហោះហើរបន្ថែមទៀត មានន័យថា នឹងថយចុះជាងមុន ហើយសំខាន់បំផុតវាមានផលប៉ះពាល់ផ្លូវចិត្តយ៉ាងខ្លាំង»។
លោក Freuding បាននិយាយទៀតថា រុស្ស៊ីមានអារម្មណ៍ថា មានសុវត្ថិភាពនៅក្នុងទឹកដីដ៏ធំរបស់ខ្លួន ដែលនេះក៏ពន្យល់ពីមូលហេតុដែលយន្តហោះនេះមិនត្រូវបានការពារយ៉ាងល្អ។
ឧត្តមសេនីយរូបនេះបាននិយាយថា «បន្ទាប់ពីប្រតិបត្តិការជោគជ័យនេះ វាលែងជាការពិតទៀតហើយ។ រុស្ស៊ីនឹងត្រូវបង្កើនវិធានការសន្តិសុខ»។
ប្រវត្តិរឿង៖
នៅថ្ងៃទី 1 ខែមិថុនា ឆ្នាំ 2025 សេវាសន្តិសុខនៃប្រទេសអ៊ុយក្រែន (SSU) បានអនុវត្តប្រតិបត្តិការពិសេសមួយដែលមានឈ្មោះថា Pavutyna (“Spider’s Web”) ដោយវាយលុកយន្តហោះយុទ្ធសាស្ត្ររបស់រុស្ស៊ីនៅឯអាកាសយានដ្ឋានចំនួនបួន។
ប្រធាន SSU លោក Vasyl Maliuk បាននិយាយថា 34ភាករយ យន្តហោះផ្ទុកកាំជ្រួច Cruise Strategy នៅឯអាកាសយានដ្ឋានសំខាន់ៗរបស់រុស្ស៊ីត្រូវបានបំផ្លាញ។ SSU បាននិយាយថាការចំណាយប៉ាន់ស្មាននៃឧបករណ៍ដែលត្រូវបានបំផ្លាញជាលទ្ធផលនៃប្រតិបត្តិការ Spider’s Web គឺជាង 7 ពាន់លានដុល្លារ។
មន្ត្រីជាន់ខ្ពស់ណាតូម្នាក់បានហៅប្រតិបត្តិការនេះថាជាប្រតិបត្តិការដែលជោគជ័យបំផុតនៅឡើយ។ សម្ព័ន្ធបានប៉ាន់ស្មានថា យ៉ាងហោចណាស់មានយន្តហោះ៤០គ្រឿងត្រូវបានខូចខាត។ យន្តហោះចន្លោះពី ១០ ទៅ ១៣ គ្រឿងត្រូវបានបំផ្លាញទាំងស្រុង។
ប្រធានាធិបតីអ៊ុយក្រែន Volodymyr Zelenskyy បានសង្កត់ធ្ងន់ថា សេវាសន្តិសុខបានប្រើប្រាស់អាវុធអ៊ុយក្រែនទាំងស្រុងក្នុងប្រតិបត្តិការនេះ ហើយមិនបានប្រើប្រាស់ឧបករណ៍ពីឃ្លាំងសម្ព័ន្ធមិត្តឡើយ៕
