លំនៅឋានអ៊ុយក្រែនជាង 100,000 ត្រូវបានកាត់ផ្តាច់ដោយគ្មានថាមពល ដោយសារការវាយប្រហារដោយយន្តហោះគ្មានមនុស្សបើកចុងក្រោយបង្អស់របស់រុស្ស៊ីទៅលើហេដ្ឋារចនាសម្ព័ន្ធថាមពល។ នេះបើតាម លោក Volodymyr Zelensky ។
លោកប្រធានាធិបតី Zelensky បាននិយាយនៅក្នុងការបង្ហោះនៅលើ Telegram ថា តំបន់ Poltava, Sumy និង Chernihiv ត្រូវបានរងផលប៉ះពាល់។
ក្រសួងថាមពលរបស់អ៊ុយក្រែនបាននិយាយថា វាជាការបន្តគោលនយោបាយរបស់ទីក្រុងម៉ូស្គូក្នុងការបំផ្លាញហេដ្ឋារចនាសម្ព័ន្ធស៊ីវិលនៅមុនរដូវរងា។ កាលពីឆ្នាំមុន អ៊ុយក្រែនបាននិយាយថា រុស្ស៊ីបានបំផ្លាញពាក់កណ្តាលនៃសមត្ថភាពផលិតអគ្គិសនីរបស់ខ្លួន។
ប៉ុន្តែថ្មីៗនេះ ការវាយប្រហាររបស់អ៊ុយក្រែនក៏បានវាយប្រហារទៅលើរោងចក្រចម្រាញ់ប្រេងរបស់រុស្ស៊ី និងឃ្លាំងប្រេងផងដែរ។
កាលពីថ្ងៃពុធ លោក Zelensky បាននិយាយថា រុស្ស៊ីបានធ្វើការវាយប្រហារយន្តហោះគ្មានមនុស្សបើកជិត ១០០ គ្រឿងក្នុងមួយយប់។ លោកបាននិយាយថា គ្រឿងបរិក្ខារថាមពលគឺជាគោលដៅចម្បង ហើយសាលារៀនមួយនៅក្នុងតំបន់ Kharkiv និងអគារខ្ពស់នៅ Kherson ក៏ត្រូវបានវាយប្រហារផងដែរ។
លោក Zelensky បានបន្ថែមថា «ជំហានថ្មីគឺចាំបាច់ដើម្បីដាក់សម្ពាធលើប្រទេសរុស្ស៊ីឱ្យបញ្ឈប់ការវាយប្រហារ និងធានាសុវត្ថិភាពពិតប្រាកដ។ យើងកំពុងធ្វើការជាមួយដៃគូសម្រាប់សម្ពាធបែបនេះ» ។ លោកZelensky បានបន្ថែម។
បីឆ្នាំកន្លះបន្ទាប់ពីការលុកលុយយ៉ាងពេញទំហឹងរបស់រុស្ស៊ីលើអ៊ុយក្រែន ការប្រយុទ្ធគ្នានៅលើដីមិនបង្ហាញសញ្ញានៃការធូរស្រាលទេ។
កាលពីថ្ងៃអង្គារ មន្ត្រីយោធាអ៊ុយក្រែនបានទទួលស្គាល់ថា កងកម្លាំងរុស្ស៊ីបានឆ្លងចូលក្នុងតំបន់ Dnipropetrovsk ជាលើកដំបូង ប៉ុន្តែបាននិយាយថា ការឈានទៅមុខត្រូវបានបញ្ឈប់។
ទីក្រុងមូស្គូមិនបានផ្តោតសំខាន់ទៅ តំបន់Dnipropetrovsk មិនដូចតំបន់ Donetsk និងតំបន់ភាគខាងកើតចំនួនបួនផ្សេងទៀតរបស់អ៊ុយក្រែនទេ។
កាលពីថ្ងៃពុធ ក្រសួងការពារជាតិរុស្ស៊ីបាននិយាយថា ទាហានរបស់ខ្លួនបានដណ្តើមយកភូមិមួយក្នុងទីក្រុង Donetsk។ ថ្វីត្បិតតែកងកម្លាំងរុស្ស៊ីបានទទួលរងការស្លាប់ និងរបួសខ្ពស់ក៏ដោយ ពួកគេបានធ្វើឱ្យមានការកើនឡើងនាពេលថ្មីៗនេះនៅក្នុងតំបន់។
កិច្ចខិតខំប្រឹងប្រែងអន្តរជាតិចុងក្រោយបំផុតដើម្បីសម្រេចបានបទឈប់បាញ់នៅអ៊ុយក្រែនត្រូវបានចាប់ផ្តើមដោយប្រធានាធិបតីអាមេរិក Donald Trump កាលពីដើមខែនេះ។ លោកបានជួបសមភាគីរុស្ស៊ីលោក វ្ល៉ាឌីមៀ ពូទីន នៅអាឡាស្កា និងហ្សេឡេនស្គី ជាមួយមេដឹកនាំអឺរ៉ុបក្នុងទីក្រុងវ៉ាស៊ីនតោន។
Trump បាននឹងកំពុងជំរុញឱ្យមានកិច្ចប្រជុំកំពូលពូទីន-ហ្សេលេនស្គី។ ប្រធានាធិបតីអ៊ុយក្រែនបានគាំទ្រទង្វើនេះ ប៉ុន្តែលោកបានស្វែងរកការធានាសន្តិសុខពីសម្ព័ន្ធមិត្តលោកខាងលិច ដើម្បីទប់ស្កាត់ការវាយប្រហារណាមួយរបស់រុស្ស៊ីនាពេលអនាគត ក្នុងករណីមានកិច្ចព្រមព្រៀងសន្តិភាព។
កាលពីថ្ងៃអង្គារ លោក Zelensky បានជួបជាមួយប្រមុខកងកម្លាំងប្រដាប់អាវុធរបស់ចក្រភពអង់គ្លេស លោក Adm Sir Tony Radakin ក្នុងទីក្រុង Kyiv ខណៈចក្រភពអង់គ្លេសនឹងត្រៀមខ្លួនជាស្រេចក្នុងការដាក់ទ័ពនៅលើដីនៅពេលអរិភាពបានបញ្ចប់។
កាលពីថ្ងៃអង្គារផងដែរ អធិការបតីអាល្លឺម៉ង់ លោក Friedrich Merz បាននិយាយថា ការធានាសន្តិសុខសម្រាប់អ៊ុយក្រែន នឹងផ្តល់លទ្ធភាពដល់កងទ័ពអ៊ុយក្រែន ដើម្បីការពារប្រទេសរបស់ពួកគេក្នុងរយៈពេលវែង៕
