កាសែត Bangkok Post បានរាយការណ៍ថា កងទ័ពថៃបានបញ្ជាក់ថា ខ្លួនបានត្រៀមខ្លួនសម្រាប់ព្រឹត្តិការណ៍ព្រំដែនដែលអាចកើតមានជាមួយកម្ពុជា ខណៈរដ្ឋមន្ត្រីក្រសួងការបរទេសបានសង្កត់ធ្ងន់ថា ដំណោះស្រាយដោយសន្តិវិធីគឺអាចទៅរួច។
យោងតាម Bangkok Post អ្នកនាំពាក្យកងទ័ពថៃ លោក Winthai Suvaree បាននិយាយកាលពីថ្ងៃអាទិត្យថា ចលនាណាមួយរបស់យោធាថៃ គឺសំដៅការពារផលប្រយោជន៍ជាតិ ស្របតាមគោលការណ៍អន្តរជាតិ ហើយពួកគេត្រូវបានរៀបចំសម្រាប់ស្ថានភាពណាមួយដែលអាចកើតឡើង” ទាក់ទងនឹងជម្លោះទឹកដីក្នុងខេត្ត Ubon Ratchathani ជាមួយកម្ពុជា។
ឧត្តមសេនីយ Winthai Suvaree ក៏បាននិយាយផងដែរថា ការទាមទារទឹកដីឯកតោភាគីណាមួយដោយកម្ពុជា មិនមានសុពលភាពជាអន្តរជាតិនោះទេ ព្រោះប្រទេសទាំងពីរបានព្រមព្រៀងគ្នារួចហើយក្នុងការដោះស្រាយបញ្ហាទឹកដី តាមរយៈគណៈកម្មាធិការព្រំដែនរួម (JBC) ។
នាយកដ្ឋានកិច្ចការស៊ីវិលនៃកងទ័ពភូមិន្ទថៃ កាលពីចុងសប្តាហ៍កន្លងទៅនេះ បានបង្ហោះរបាយការណ៍ និងរូបភាពនៅលើទំព័រ Facebook របស់ខ្លួនអំពីមេបញ្ជាការកងទ័ពប្រចាំតំបន់ ដើម្បីលើកកម្ពស់ស្មារតី និងត្រួតពិនិត្យការត្រៀមលក្ខណៈរបស់កងកម្លាំងរបស់ពួកគេនៅជិតព្រំដែនកម្ពុជា-ថៃ។
មេបញ្ជាការកងទ័ពទី២ លោកឧត្តមសេនីយ៍ទោ Boonsin Padklang បានជួបជាមួយទាហាននៅជិតប្រាសាទតាមាន់ធំ ក្នុងស្រុក Phanom Dongrak នៃខេត្ត Surin ខណៈដែលឧត្តមសេនីយ Benchapol Dechatiwong na Ayutthaya មេបញ្ជាការនៃក្រុមការងារ Burapha បានជួបជាមួយអង្គភាពរថពាសដែកពិសេសនៅស្រុក Aranyaprathet ខេត្តស្រះកែវ៕
