អ្នកឃ្លាំមើលថាវិវាទការងារនៅក្រុមហ៊ុនណាហ្គាវើលដ៍គ្មានដំណោះស្រាយ គឺធ្វើឱ្យខូចមុខមាត់ប្រទេសជាតិ
អ្នកសង្កេតការណ៍ លើកឡើងថា ការបណ្តែតបណ្តោយឱ្យវិវាទរំលោភសិទ្ធិការងារកម្មករជាមួយនឹងថៅកែក្រុមហ៊ុន ណាហ្គាវើលដ៍ ចេះតែបន្តដោយគ្មានដំណោះស្រាយ គឺជាការបំផ្លាញមុខមាត់ប្រទេសកម្ពុជាធ្ងន់ធ្ងរ ដែលទង្វើទាំងនេះគ្មានផលចំណេញអ្វីបន្តិចសោះសម្រាប់ពលរដ្ឋខ្មែរ និងប្រទេសជាតិ។
អ្នកប្រឹក្សាយោបល់ខាងអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី២១ វិច្ឆិកា នេះថា ដើម្បីថែរក្សាកេរ្តិ៍ឈ្មោះ និងផលប្រយោជន៍ប្រទេសកម្ពុជា ឱ្យល្អលើឆាកអន្តរជាតិ ជាពិសេសមុខមាត់រដ្ឋាភិបាល ក្រសួងការងារមានភារកិច្ចចាំបាច់បំផុតក្នុងការធានានូវការអនុវត្តច្បាប់ស្តីអំពីការងារ ច្បាប់ស្តីអំពីសហជីព និងច្បាប់ផ្សេងទៀតឱ្យសុក្រឹត ដោយគ្មានការរំលោភសិទ្ធិការងារ និងសិទ្ធិសហជីព ជាដើម។
លោក សេក សុជាតិ លើកឡើងថា ក្រសួងការងារ មានមុខនាទីសំខាន់ណាស់ក្នុងការធានាការពារនូវច្បាប់ស្តីអំពីការងារ និងច្បាប់ស្តីអំពីសហជីពនៅប្រទេសកម្ពុជា ដោយគ្មានការរំលោភបំពានពីភាគីណាមួយ។ ផ្ទុយទៅវិញ ប្រសិនបើក្រសួងការងារ បែរជាបើកដៃឱ្យភាគីណាមួយរំលោភបំពានលើភាគីមួយផ្សេងទៀត នោះប្រទេសកម្ពុជា នឹងរងគ្រោះដោយផ្ទាល់ពីទង្វើនេះ។
អ្នកប្រឹក្សាយោបល់រូបនេះ បញ្ជាក់ថា បើក្រសួងការងារ ការពារក្រុមហ៊ុនឱ្យរំលោភបំពានលើសិទ្ធិកម្មករ នោះនឹងនាំឱ្យរដ្ឋាភិបាលជាប់ឈ្មោះអាក្រក់ ព្រមទាំងបំផ្លាញផលប្រយោជន៍ពលរដ្ឋខ្មែរថែមទៀត ខណៈក្រុមហ៊ុនបរទេសល្អៗដែលគោរពច្បាប់ នឹងមិនហ៊ានចូលទៅបណ្ដាក់ទុននៅប្រទេសកម្ពុជាឡើយ ដែលនេះនឹងធ្វើឱ្យប៉ះពាល់ដល់សេដ្ឋកិច្ចជាតិយ៉ាងធ្ងន់ធ្ងរ។
កាលពីថ្ងៃទី២០ ខែវិច្ឆិកា ឆ្នាំ២០២៥ ក្រុមកូដករនៃក្រុមហ៊ុន ណាហ្គាវើលដ៍ បានប្រមូលផ្ដុំគ្នាបន់ស្រន់ព្រះអង្គដងកើ នៅមុខព្រះបរមរាជវាំង និងលែងសត្វ ដើម្បីសុំឱ្យជនរងគ្រោះទទួលបានដំណោះស្រាយពីការរំលោភសិទ្ធិការងារពីថៅកែក្រុមហ៊ុន ណាហ្គាវើលដ៍។
ក្រុមកូដករទាំងនេះអះអាងថា ពួកគេទាំងអស់គ្នាបានរងនូវភាពអយុត្តិធម៌ពីក្រុមហ៊ុន ណាហ្គាវើលដ៍ ដោយការរំលោភសិទ្ធិការងារអស់រយៈពេលជាង ១៤០០ថ្ងៃមកហើយ (១៤៣៣ថ្ងៃ) ប៉ុន្តែកម្មករនិយោជិតរងគ្រោះទាំងនេះនៅតែមិនទាន់ទទួលបានដំណោះស្រាយនៅឡើយ។
ប្រភពដដែលបញ្ជាក់ថា ការផ្អាកធ្វើកូដកម្មទាមទារយុត្តិធម៌ពីពួកគេនាពេលនេះ គឺដោយសារមើលឃើញការឈ្លានពានពីប្រទេសជិតខាងមកលើប្រទេសកម្ពុជា មិនមែនមានន័យថាពួកគេបោះបង់នូវសិទ្ធិទាមទារយុត្តិធម៌របស់ខ្លួនឡើយ ហើយការតវ៉ាទាមទារយុត្តិធម៌នេះ ក៏មិនមែនជាការស៊ីឈ្នួលឱ្យអ្នកណាដែរ គឺធ្វើដើម្បីតែសិទ្ធិការងារស្របច្បាប់របស់កម្មករនិយោជិតតែប៉ុណ្ណោះ។
នៅថ្ងៃទី៨ ខែមេសា ឆ្នាំ២០២១ កន្លងទៅ ក្រុមហ៊ុន ណាហ្គាវើលដ៍ បានបញ្ឈប់កម្មករនិយោជិតជាង ១ពាន់នាក់ (១៣២៩នាក់) ក្នុងបំណងរំលាយសហជីពក្នុងក្រុមហ៊ុននេះ ក្រោមលេសជួបវិបត្តិជំងឺកូវីដ-១៩ ព្រោះថាបុគ្គលិកទាំងជាង ១ពាន់នាក់នេះ គឺសុទ្ធសឹងតែជាថ្នាក់ដឹកនាំ និងជាសមាជិកសហជីពដែលតែងតែតវ៉ាទាមទារសិទ្ធិការងារជូនកម្មកររងគ្រោះកន្លងមក៕ ប្រភព៖
#TheCambodiaDaily #WithoutFearOrFavour #HunSen #HunManet #Cambodia #cambodiathai #border #thailand
